Светската фудбалска федерација го прифати барањето на УЕФА за бришење на жолтите картони пред баражите за пласман на Мундијалот, но одлучи веќе акумулираните суспензии да останат.
Одлуката на ФИФА нема апсолутно никаков ефект врз полуфиналните баражи, туку повеќе се однесува на финалињата.
Имено, избришани се само жолтите картони на играчите кои имаат по еден и кои беа под закана доколку добијат уште еден да не играат во евентуално финале.
ФИФА не прифати да се избришат суспензиите поради парни жолти картони, како и од црвените картони.
Ова значи дека Македонија на 24 март против Италија сепак ќе мора да игра без нашиот моментално најдобар фудбалер - Елиф Елмас, како и без играчот од средниот ред Тихомир Костадинов. Двајцата пожолтеа на последниот дуел против Исланд во ноември и заработија суспензија од еден натпревар.
Ваквата одлука во прилог ѝ оди на Италија која имаше дури десетмина кои беа под закана од суспензија доколку добиеја жолт картон, што ќе значеше дека немаше да играат доколку Италија би се пласирала во финалниот бараж. Такви играчи беа Џанлуиџи Донарума, Николо Барела, Федерико Бернардески, Џорџо Кјелини, Лоренцо Инсиње, Лоренцо Пелегрини, Матео Пезина, Рафаел Толои, Сандро Тонали, како и Федерико Кјеза кој и онака нема да игра поради тешката повреда.
И кај нас исто така има 10 играчи кои би избегнале суспензија за финалниот бараж само поради еден жолт картон, а такви се Езџан Алиоски, Бобан Николов, Влатко Стојановски, Марјан Радески, Дарко Велковски, Стефан Спировски, Адис Јаховиќ, Столе Димитриевски, Стефан Ристовски и Бојан Миовски.
Победникот од дуелот на Италија и Македонија, кој ќе се игра во Палермо, потоа билет за Мундијалот во Катар ќе бара против победникот од натпреварот Португалија - Турција.
