Во објавена генетска анализа е истакнато дека само еден човек бил извор на зараза на 700 луѓе на крузерот на Diamond Princess, едно од првите жаришта на COVID-19.
Тој брод стана идеален предмет за проучување и богат со лекции за светската научна заедница.
Студијата е објавена во американското списание PNAS. Тим од јапонскиот Институт за инфективни болести вели дека имаат секвенца од геном на вирусот земен од 148 патници и членови на екипажот на бродот кој јапонските власти го ставија во 14-дневен карантин на 3 февруари, откако еден 80-годишен патник кој претходно излезе од бродот во Хонгконг на 1 февруари беше позитивен на вирусот.
Сагата за карантинот на повеќе од 3.600 патници и членови на екипажот беше следена од целиот свет. Јапонија беше критикувана што не дозволи евакуација на бродот, додека земјите како што се САД правеа пресметки како да ги вратат американските државјани.
Сепак, на крајот околу 700 од 3.711 луѓе на бродот беа заразени со коронавирусот. Од нив починаа седум лица.
Студијата на податоци добиени од тој затворен простор на зараза доведе до првите процени на смртност од коронавирусот, тоа се 1,2 проценти.
Новата генетска анализа од материјалот на бродот покажа дека сите пронајдени вируси на бродот делат иста мутација што укажува дека ширењето на SARS-CoV-2 на бродот потекнува од само еден настан на внесување пред почетокот на карантинот, заклучија јапонските научници.
Заразата веројатно се раширила во текот на големите собири на патниците во заеднички простории каде играле, пееле, купувале и присуствувале на претстави.
