108-годишната Англичанка Ада Даниел на вработените во старечкиот дом во кој престојува им ја откри нејзината тајна на долговечноста. Верува дека клуч за нејзината долговечност е чувањето кучиња место деца.
За 108. роденден што го прослави во јуни добила повеќе од 300 честитки од добронамерници, а меѓу нив имало и честитка од кралот и кралицата, објавија британските медиуми.
Во изјава за BBC, вработената во старечкиот дом во кој престојува, Кели Гушер, вели дека пензионерката е „дефинитивно карактер“.
„Еднаш ја прашав која е нејзината тајна и таа рече дека тајната е да се има кучиња, а не деца“, вели Гушер.
Гушер сведочи дека старечкиот дом помогнал за роденденот на Ада. Таа била возбудена за роденденот уште од почетокот на април – па домот одлучил да покрене апел за да ѝ помогне да прослави.
На Facebook страницата на домот споделиле фотографии од насмеаната Ада со летен пијалак в рака.
„Нашата прекрасна Ада полни 108 години в четврток на 1 јуни. Би сакале да добиеме 108 роденденски картички за одбележување на пригодата“, напиша домот во објавата.
Веќе следниот ден имале 135 пораки од луѓе кои сакаат да ѝ испратат честитки на Ада.
