Германскиот обвинител Ханс Кристијан Волтерс изјави дека има докази кои укажуваат дека исчезнатата Меделин Мекен е мртва.
Тој рече дека на полицијата ѝ се потребни уште информации и упати апел до луѓето кои престојувале во одморалиштето Праиа да Луз пред 13 години кога исчезна Британката Меделин, да споделат каква било информација што ќе помогне во истрагата против осомничениот педофил Кристијан Б.
Волтерс призна дека засега „нема цврсти докази“ за да може да го изведат на судење осомничениот кој отслужува затворска казна во Германија по други обвиненија за злоставување деца.
„Судејќи по сите информации кои ги добивме, девојчето е мртво. Нема информации дека е жива. Сите индиции кои ги имаме, а за кои не можам да зборувам со јавноста, укажуваат во една насока – Меделин е мртва“, рече тој.
Волтерс нагласи дека уште немаат најдено тело и дека секоја информација за движењето на Кристијан Б. Во португалското одморалиште од каде исчезна Меделин ќе биде корисна и во таа насока.
Меделин имаше речиси четири години кога исчезна од апартманот каде престојувала со нејзините родители во туристичкото место Праиа да Луз во Алгарве, Португалија во 2007 година.
Таа спиела во апартманот додека родителите биле на вечера со пријателите во непосредна близина.
Германскиот обвинител рече дека неговата истрага сега го опфаќа целиот период во кој се смета дека осомничениот живеел во Алгарве, од 1995 до 2007 година.
„Ни треба помош и од британските туристи кои можеби престојувале во Праиа да Луз во периодот од 1995 до 2007 година. Само така ќе можеме да го решиме случајот на Меделин Мекен“, рече Волтерс.
„Засега немаме доволно докази за да го изведеме Кристијан Б. на суд, но имаме некои докази дека тој е убиецот“, додаде тој.