Хади Матар, човекот кој се обиде да го усмрти славниот писател Салман Ружди, пред новинарите призна дека е изненаден што писателот преживеа и дека тој всушност прочитал само две страници од книгата „Сатански стихови“.
„Прочитав само неколку страници, не ја прочитав целата книга до крај“, изјави Матар преку видеолинк пред новинарите на New York Post.
Тој се наоѓа во притвор каде е задржан поради обид за убиство и напад на писателот Салман Ружди.
Матар изјави дека го почитува иранскиот лидер Рухолах Хомеини, но не сакаше да потврди дека неговата фетва за Салман го инспирирала да изврши напад на писателот.
„Едноставно не ја сакам таа личност. Мислам дека не е добар човек. Не го сакам, навистина воопшто не го сакам. Тој е човек кој го нападна исламот, ја нападна верата, го нападна системот“, изјави Матар за Ружди.
Инаку, Матар во нападот врз Ружди му нанесе 10 убоди со нож, му го оштети црниот дроб и му пресече нерви во раката и окото. Писателот моментално закрепнува, но се уште се наоѓа во болница.
