Виролозите потврдија дека еден пациент во Холандија и уште еден во Белгија се заразени со коронавирусот по вторпат, објави холандскиот национален сервис NOS.
Веста следи откако неделава истражувачи од Хонгконг потврдија дека еден човек во градот е одново заразен со коронавирусот, четири и пол месеци откако бил прогласен за оздравен.
NOS ја цитира Марион Копманс, виролог, која изјави дека холандскиот пациент е постаро лице со ослабен имунолошки систем.
Таа додаде дека имало случаи кај кои болеста почнала да се повлекува, па повторно распламтува и тоа се пациенти кои долго боледуваат од COVID-19.
Реинфекцијата кај овие три случаи била потврдена со генетски тестови на вирусот од првата и втората зараза, при што било утврдено дека двете врсти се разликуваат.
Копманс, која е советник на холандската Влада, исто така рече дека случаите на реинфекции биле очекувани.
„Не ме загрижува тоа што се појави пациент по вторпат инфициран со коронавирусот. Треба да видиме дали тоа се случува често“, нагласи таа.
Пациентот во Белгија е сосема поинаков случај.
Тој има благи симптоми, пренесе вирологот Марк ван Ранст и додаде дека „тоа не се добри вести“.
Според него, овој случај покажува дека антителата кои пациентот ги развил за време на првата инфекција не биле доволни за да спречат второ заразување со друга врста на вирусот.
Ван Ранср рече дека не е јасно дали овие случаи на реинфекција се ретки или „има многу повеќе луѓе кои би можело повторно да се заразат по шест или седум месеци“.