Бугарскиот дизајнер Енчо Енчев креираше концепт на футуристички подвижен дом дизајниран така што може да се движи по различни терени со помош на шест механички нозе со цел сопственикот или корисникот да може да постави камп на кое било посакувано место.
Дизајнерот вели дека бил инспириран од зголемената популарност на работата од далечина, односно од неговата љубов кон планините и езерата. Тој увидел дека луѓето сакаат да ги напуштат градовите и да се преселат во ретко населените подрачја во природа, но и дека им недостига удобноста на домот и пристапност поради тешките терени.
Овој негов концепт нуди решение за овие проблеми. Функционалноста и практичноста биле клучни во развојот на неговата идеја, односно во дизајнирање на мобилниот дом, кој го движат електрични мотори но поседува и помошен дизел генератор.
Дизајнот е во форма на коцка, поставен е на шест механички нозе така што изгледа како да е излезен од некој футуристички филм. Може да се движи скоро на сите терени вклучувајќи и стрмни ридови и планини благодарение на нозете со гумени слоеви.
