Култниот стадион „Џузепе Меаца“ во Милано е минато, а познатиот италијански архитект Анџело Рена планира да дизајнира необичен објект.
Фудбалските гиганти Милан и Интер претставија план со кој до 2027 година ќе го добијат еден од најмодерните стадиони во светот.
Стадионот „Ла Катедрале“ ќе биде новиот симбол на фудбалот во Италија. Милан и Интер заедно започнуваат со голем проект за изградба на стадион кој на клубовите ќе им донесе 80 милиони евра годишна заработка од 2027 година.
Сепак, култниот стадион „Џузепе Меаца“, познат и под прекарот „Сан Сиро“ според населбата во која се наоѓа, заминува во историјата и се планира да биде урнат. Сѐ уште не е познато што ќе има на местото на познатиот стадион, но архитектот Анџело Рена ги претстави своите планови.
Славниот Италијанец претстави план со кој се предвидува на местото на стадионот да се засадат 35.000 чемпреси, кои ќе бидат споменик на починатите од коронавирус во таа област.
„Главната идеја е да се спасат делови од стадионот од уривање и да се претвори целата структура во место за комеморација за сите жртви на коронавирусот“, изјави Рена за дизајнерскиот магазин Dezeen.
Тој додаде дека планираат да направат место каде што семејството и пријателите на жртвите ќе дојдат да се поврзат со нивните најблиски и да им оддадат почит.
