Австралија веќе ги забележа првите случаи со јужноафриканската варијанта, а Израел ги затвори границите за странските државјани.
Омикрон доведе до сомнеж во глобалните напори во борбата против пандемијата бидејќи постои стравување дека варијантата Б.1.1.529 е многу заразна поради што повеќе земји повторно воведоа строги рестриктивни мерки.
Велика Британија, САД, Холандија, Катар и Кувајт веќе најавија ограничувања во патувањата од Јужноафриканска Држава, а најстроги мерки најави Израел, земја која ги затвора границите за сите странци.
Научниците сега се обидуваат да откријат дали јужноафриканската варијанта ги заобиколува сегашните вакцини.
Вирусот се рашири по светот, од Холандија до Хонгконг и Австралија. Светската здравствена организација ја класифицираше омикрон како загрижувачка варијанта.
Според јужноафриканскиот виролог Тулио де Оливеира, кој ја откри варијантата, забраните за патување научно немаат многу смисла во борбата против ковид.
Де Оливеира потсети дека Вашингтон таква забрана за патувања наметна на Кина на почетокот на пандемијата, за потоа токму САД да имаат најголем број заразени.
„Понекогаш сме казнети бидејќи сме транспарентни и работиме брзо“, се пожали вирологот.
Во меѓувреме, јужноафриканското здружение на лекари (САМА) објави дека луѓето заразени со новата варијанта на коронавирусот не се сериозно разболени. Пациентите најчесто се жалат на болки во телото и умор, односно екстремен умор и тоа се симптоми кај помладите генерации, не кај повозразните лица.
