По рекорден шести пат андалузискиот состав ќе игра финале од Лига Европа откако синоќа со 2:1 славеше над Манчестер Јунајтед.
Натпреварот почна добро за тимот на Оле Гунар Солскјер бидејќи уште по 9 минути игра добија пенал. Диегу Карлус стартуваше грубо над Маркус Рашфорд, па со помош на ВАР беше досуден пенал иако во моментот на стартот Рашфорд веќе имаше шутнато. Ескпертот за пенали, Португалецот Бруну Фернандеш, уште еднаш не погреши од белата точка во својата листа додавајќи го и мароканскиот голман Боно.
Севиља израмни во 26. минута кога Серхио Регилон одлично го пронајде Сусо кој, пак, беше тотално заборавен од манчестеровата одбрана на втора статива.
По три измени на Хулен Лопетеги, Андалузијците направија целосен пресврт во 78. минута кога нововлезениот Лук де Јонг од Хесус Навас доби одлично нафрлена топка во казнениот простор и ја затресе мрежата на Давид де Хеа.
Дури тогаш Солскјер направи четири замени, но неговиот тим не успеа да израмни и се соочи со елиминација.
За Севиља финалето в петок ќе биде апсолутен рекорд, вкупно шесто. Досега во сите пет (2006, 2007, 2014, 2015 и 2016) Севиља успеваше да победи, па оттаму има и најмногу трофеи во ова натпреварување.
Противникот на Андалузијците ќе биде познат вечер откако Интер и Шахтар ќе си ги одмерат силите.
