Неознат објект со бавно движење прелета навистина блиску до нашата планета пред повторно да се упати во длабочините на Сончевиот Систем. Но, според траекторијата, објектот би требало повторно да нѐ посети во март, а научниците не знаат што е.
Непознатиот објект налик на мини месечина е официјално означен како 2020 SO и е предмет на разни шпекулации уште откако беше откриен на 17 септември. Првично беше класифициран како астероид, но научниците сѐ уште не знаат што навистина е. Некои тврдат дека е дел од стара ракета.
Што и да е, има дијаметар од 5 до 10 метри и прелета покрај Земјата на оддалеченост од 50 илјади километри. Тоа е само 13% од оддалеченоста до Месечината и во домет на земјината гравитација, што значи дека повторно ќе се врати по неколку месеци.
Енигмата околу потеклото на објектот потекнува од самото негово движење. Патува со многу помала брзина отколку најголемиот дел астероиди кои отприлика се движат со брзина помеѓу 11 и 72 километри во секунда, додека 2020 SO се движи само 0,6 километри во секунда.
Многумина во научната заедница веруваат дека е остаток од вселенското летало Surveyor 2 кое во 1966 година одеше кон Месечината.
„Не сме сигурни дали е астероид бидејќи може да биде и ракетен погон од Surveyor 2 леталото на НАСА уште од 1966“, велат научниците кои со телескоп го набљудувале објектот.
