Протекоа пораки разменети помеѓу поранешниот претседател на Кралската фудбалска федерација на Шпанија и претседателот на УЕФА, а во кои се појавува претседателот на Реал Мадрид.
Односите помеѓу претседателот на Реал, Флорентино Перес, и првиот човек на УЕФА, Словенецот Алксандер Чеферин, почнаа да се рушат во 2019 година.
Причината беше спротивставените ставови околу проектот за Суперлигата. Во тоа време првиот човек на РФЕФ, Луис Рубиалес, имаше многу добри односи со Чеферин. Шпанскиот весник The Objective ги добил пораките што ги разменувале Рубиалес и Чеферин, а во една од нив Словенецот го нарекува газдата на Реал „идиот и расист“.
Разговорот наводно датира од декември 2019 година. Рубиалес во порака до Чеферин истакнува дека шпанските медиуми го доведуваат во тешка ситуација, го поврзуваат со Чеферин и го туркаат во конфликт со Перес, односно сакаат тој да се изјасни за Суперлигата, но истакнува дека ќе продолжи со идејата на Чеферин бидејќи тоа мора да се направи, иако му е многу тешко.
Рубиалес додаде дека претседателот на Ла Лига, Хавиер Тебас, има одредени медиумски куќи в џеб и ги плаќа за да создадат лоша слика за него, но Чеферин го уверил:
„Не грижи се, секогаш ќе бидам на твоја страна“.
„Во добра позиција сме, ако сакаш можам да поразговарам со Флорентино“, му одговорил Чеферин.
„Не можам да ги имам Перес и Тебас во Шпанија на спротивна страна. Перес е горд човек. Тоа ќе биде невозможна позиција за мене“.
На тоа Чеферин му одговорил:
„Не заборавај, и јас имам гордост, не сакам ни јас да разговарам со него. Би го направил тоа само за тебе. Перес е идиот и расист! Не мора поради мене да ја смируваш ситуацијата. Само сакам ти да бидеш во силна позиција“.
