На денешен ден во 2010 година Горан Пандев стана третиот Македонец што го освоил најреномираното клупско натпреварување на УЕФА.
Таа мајска вечер на стадионот „Сантјаго Бернабеу“ во Мадрид нашиот Гоче беше во стартниот состав на Интер, тогаш предводен од Жозе Мурињо. Противник беше баварскиот гигант Баерн.
Пандев играше како десно крило и заедно со Самуел Ето, кој беше лево, му даваа поддршка на истурениот голгетер Диего Милито. Токму Аргентинецот ги постигна двата гола со кои Интер победи и го зграпчи вредниот пехар.
Струмичанецот играше до 79. минута кога беше заменет со Сули Мунтари. Тоа се случи 9 минути откако Милито зголеми на 2:0, па Мурињо како превентива внесе играч со дефанзивни задачи.
Пандев е вкупно третиот Македонец кој станал клупски шампион на Европа. Пред него тоа им успеа на Илија Најдоски и Дарко Панчев кои во 1991 година со Црвена звезда на пенали го совладаа Олимпик од Марсеј во финалето од тогашниот Куп на шампионите.
Таа 2010 година за Пандев беше и тоа како успешна. Покрај Лигата на шампиони, тој во црносиниот дрес ги освои и Копа Италија, Серија А и Светското клупско првенство.
